पोवारी पुस्तक परीचय......भाग -१

                                                      पोवारी पुस्तक परीचय......भाग -१

                                             संकल्पना अना शब्दांकन - गुलाब बिसेन

पुस्तकको नाव -  त...आता करोना.....आपलो विकास
पुस्तकको प्रकार - कवीता संग्रह
कवी - मनराज पटेल  "मयुर"
प्रकाशक - चंद्रमोहिनी प्रकाशन , साकोली
मूल्य - ५१ रू.
प्रथमावृत्ती - १३ फेब्रु. २००५

अॅड. मनराज पटेल झाडीपट्टीमा विधी क्षेत्रमा अगाजेव नाव. वूनको जनम १६/०९/१९४३ ला गुढरी गावमा भयेव. तसात् वय गुरूजी होता पर बादमा वकील बनस्यान वकीलीमाच जळ जमायस्यान रह्या. आपलो व्यवसाय करत करत वय साहित्यमाबी रमन बस्या. वोकमाबी "मायबोली पोवारी" वूनला जादा जवरकी होती. कवी पटेलजीनन् पोवारी बोलीला कागजपर शब्दबद्ध करनको प्रयास करीन. वूनको येव प्रयास नव साहित्यिकयीनला प्रेरणायी से.

"त.... आता करोना......आपलो विकास" या वूनकी पोवारीमाकी दुसरी निर्मिती आय. येक् पयले वूनन्  "जागो भाऊ आता जागो"  या पुस्तक लिखीसेन. प्रस्तुत पुस्तकक मनोगतमा कवी कसेत , आपल् पोवार समाजमा जसा धनवान अना गुनवान सेती. तसाच गरिब - गुंडाबी सेती. जिनन् शिक्षणक् बलबुतापर खुदकी तरक्की करीन , वूनन् आता आपल् पोवार समाजक् उन्नतीकन ध्यान देये पायजे.

पोवार समाजमा नवजागृती करनसाती कवी मनराज पटेल ईनन् पन्नास कविताईनको येन् कविता संग्रहक  "जागो" येन् कवितामा लिखसेत ,
गई सारी जमीनदारी , गई मालगुजारी
गयो कहां कामत आमरो , कहां गावखारी
दुए सौ को दुय एकर्‍या भयव , खाबो का आता सांगो ?

आता गांधारीको सारपा येन् कवितामा कवी कुटुंब नियोजनको महत्व पटायस्यान सांगनको प्रयास करसेत. वय कसेत ,
फसल सारी भई - बरबाद , धानला लगेव करपा
सांग कसो पालू आता , गांधारीको सारपा

तीन सालमा दुए , दस बरसामा भया सात
एक बसंसे डोस्कीपर त् दुसरो मारंसे लात
आमर् घरको भडक भुंज्या कव्हसे देव की कृपा

कवी विद्या ग्रहन करस्यान एक दुसरोका पाय खिचनकी वृत्ती सोळस्यान समाजन् सामने बढे पायजे , येकसाती कवी कसेत ,
चाल- चलन , रिती - रिवाज सब बाताबाती
जासेत लोक पुढं , पोवार काहे मंग् ठाक् सेती

सुरतला सुंदर पर हिम्मत से भाऊ कम
आत्मविश्वस बढाओ , पिछो ना दो कदम
ज्ञान - विद्या बढाओ तो नवा रस्ता दिस् सेती

बाप दादायीनक् कमायेव धनपर खानका दिवस आता गया. आता नशापाणी , फिजुल खर्चा सोळो , विद्या हासिल करो. अना खुदकी तरक्की करो. असो आवाहन कवी समाज भाईनला करसेत.

येन् संग्रहमा बन जावो तुम्ही सरदार , बहोवो खेतमा धार , आता लेबोन ट्रॅक्टर , काॅलेजमा मोला पठावोना , करो बिह्या सामुहिक अशी समाजला दिशा देनेवाली कविता सेती. उनक् बराबरच बनावो लसन चिल्हा , बनावो मोला सरपंच , चलो जमानोको संग , आवनकी नही मी बाई , याद काहे आवसे असी अलग रंग अना ढंगकी कविताबी बाचनेवालोला आनंद अना सीखबी देयस्यान जासेत.

शब्दांकन - गुलाब रमेश बिसेन ,
मु. सितेपार , ता. तिरोडा , जि. गोंदिया ४४१९११
मो. नं. 9404235191

*********************************************