प्रा. डॉ. शेखरामजी येळेकर इनका पत्र

मी मोर् बाबुजीला लिखेव होतो वु एक पुरानो पत्र- १९९६ को खेतीबाडीलक जुडी से)

(वु पत्र मराठीमा होतो वको पोवारी अनुवाद करेव )

आदरणीय बाबूजी, 

तुमरो बेटा शेखर करलका

सा. न. वि.वि.

यन् उनारोमा मी सिंदीपारला आवु कयोव होतो पन मोरो आवनो नही जमनको. 

मोरी परीक्षा होनलाच से. परीक्षा की मोला तयारी करनकी से. मनुन मी नही आवनको.

तुमरो करसा भरस्यानी भयीच रहे. आंबाको पना, पापड, कुरुडी ना शेवयी खानकी बहुत आस होती पन आस अासच रय गयी. 

बाबुजी, मोला मालुम भयेव का  आमर् गावमा नवा नवा घर बन रह्या सेती.

 तुमला बाडकाम साजरो आवसे मनुन गावमा आडा फाटा ठोकनसाती तुमरोच नंबर लगसे, मनुन तुमी वन् काममा व्यस्त सेव असो मालुम भयेव.

ज्यादा तपनमा काम करसेव पन तपनमा आपलो खयाल रखनोबी बहुत जरुरी से. तुमी बीडी मनमाने पीवसेव जरा कमी पियात त् मोला बहुत साजरो लगे. 

एक पानी पडेपरा खातकी डॉली बांधिनकी कोशिस करो. खातकडी वंगन्या(नरा) कोटामाच सेती. मोंगाळवाल परखनमा ज्यादा मुरखात टाकनकी कोशिस करो. 

नांगर,फण, पट्टा, बखर, जुवाडी ना बारती सुधरायकन ठेय देवो, तसो तुमीच बढयीको काम बढीया करसेव मनुन मोला वकी चिंता नही. 

कोनला घडी भरसाती सामान देनको रहे त् ध्यानमा ठेवत जाव, कोनी सामान लिजासेत अना आनच् नही देत. कोन् काेनतो सामान लिजाईस यव मायला(आईला) सांगस्यानी ठेवत जाव. 

पानी आवनक् पयलेच धुरा पार पेटायकन भया पायजेत. वाकडी मोवुरली वालो धुरा अना बोर वालो धुरा मायला साजरो पेटावनला सांग देवो. परा लगावनक् भारी बोर वाल बांदीका काटा कोनला नही त् कोनला गडसेतच मनुन मोरी माय दुसर् बांदीको कचरा ना वारेव मोवु को पाला टाकस्यानी बांदीका काटा पेटाय टाके. तसोच धुरापरका ताेरका ठाटा आबच् मोडस्यानी ठेय देये. ठाटा कोनला लिजान नोको देवो. बरसातमा पानी गरम करनला बेस होसेत.

यन साल पहिलेच खारी नोको भरो, कचरा वापनदेव. मंग खारी भरो.

गयेसाल् खऱ्यानवाल् परखनमा मनमाने सावा ना कचरा वापेव होतो. तुमला लगेत् खऱ्यानवाली परखन बदलाय टाको.

परा लगावनक् घनी बन्यारनी भेटत नही फटेतक रोजी रवसे मनुन आबच सुरेकांता भोवजीला सांगकन ठेय देवो. जमेत् कोनक् आंगपर पैसा देयकन ठयराव टाकन्.

मायला भर तपनमा खेत नोको पटावो. महातीनबेरा गयी त चले. 

माय धुरापरा तोर लगावनसाती धुरा को कोडका साजरो करे. दुयक बन्यारनी बनाय लेये. तुमी बांदीमा साजरा तास टाककन देवो. धुरापर माती टाकनसाती साजरो होसे.

बाबूजी तुमी गावक् सोसायटीलका कर्ज लेय लेवो.

वन् पैसा मा युरीया, कृषी उद्योग खात की चुंगडी आनस्यानी ठेय देवो. 

बइलला चारा पानी साती तनीसका बेट मारस्यानी ठेवो. तनीस कम जायेत् आबच कोनीबी जवरको तनीसको सौदा करस्यानी ठेवो. नही त् मालुटोलामा मामाजीक् गाव सस्ती तनीस भेटसे कसेत, वक् साती बडेगाव मालुटोलाला एकान चक्कर मार लेवो. 

मी परा लगावनक् घनी (रोवनामा)पेंडी फेकनसाती जरुर आवनकी कोशिस करु. गये साल् इला भोवजी अना अनुसया भोवजी इनक् खेत् पेंडी फेकनसाती गयेव होतो ना मंग बन्यारनी नही भेटी मनुन दिवसभर १६ रुपये रोजीलका परा लगावनसाती(रोवना रोवनसाती) मदत करेव होतो. यन साल उनला सांग देवो का अगर मी आवु त् मी दुय रुपया रोजी ज्यादा लेवु. 

बाबूजी मोरी ज्यादा चिंता करनकी नही. इत् सब ठीक ठाक से. 

दुय रुपया ज्यादा रोजी वाली बात इला ना अनुसया भोवजीला सांग देवो. 

मायला ना तुमला दंडवत प्रणाम

सबला मोरो नमस्कार सांग देवो

तुमरो बेटा, 

शेखराम परसरामजी येळेकर

शेखर

(टीप:- अजक् तारीख ला (२५/५/२०२०ला )मोरा बाबूजी, मोरी माय ना इला भोवजी नाहाती. अनुसया ना सुर्यकांता भोवजी सेती)

अनुवाद दि. २५/५/२०२०