🙏 *शिवजी की पोवारी आरती*🙏
आरती शिवभोला, बिनती करुसु मी तोला
आशिष दे रे देवा, आब् पाव देवा मोला।। धृ।।
कैलास तोरो धाम, डमरु बजे डमडम
दयावान तुच देवा, बेल फुल देसु तोला
आरती शिवभोला।। १।।
विभूती से तोला प्यारी, तू सेस जटाधारी
गरामा शोभ् देवा, शोभ् सरपकी माला
आरती शिवभोला।। २।।
जेन् करीस तोरो ध्यान, वोला देयेस वरदान
कृपादृष्टी तोरी मोठी, धन्य भया तोरा चेला
आरती शिवभोला।। ३।।
करु तोरो गुणगान, भक्ती मा से मोरो मन
दुख मोरो हरणसाती, देखाव तोरी लिला
आरती शिवभोला।। ४।।
संग तोर् पारबती, संग टुरा गणपती
महिमा से न्यारी देवा, वंदन करुसु मी तोला
आरती शिवभोला ।।५।।
तांडव नृत्य देवा, तोरो रव महाभारी
खोल तोरा डोरा आब्, जराय टाक विपत्तीला
आरती शिवभोला।। ६।।
भक्ती तोरी करु देवा, हर हर महादेवा
भक्त की लाज राख, हाका मारु देवा तोला
आरती शिवभोला।। ७।।
******
*डॉ. शेखराम परसराम येळेकर नागपूर* २१/८/२०२०
*पोवारी इतिहास साहित्य अना उत्कर्ष*
No comments:
Post a Comment