परीरानी
गोरी गोरी पान चांदणी सरीखी छान
सुंदर सुंदर पंख जसो पिपर का पान
सुंदर सलोनी होती परी गोरी गोरी
हातमा परीको एक जादू की छडी
जादुलक हिरवो हिरवो करसे रान
सुंदर सुंदर पंख जसा पिपर का पान
एक दिवस मोरो संग वा खेलनला आईं
मोला कसे देखाव तोरो गणित की वही
मोरो दूही डोराला लगी आसुकी धार
सुंदर सुंदर पंख जसा पिपर का पान
रोवु नोकों कसे मोला परीलोक जाबिन
परीको शाळा मा अंकगणित शिकबिन
परीलोककी शाळा मस्त जादू की खान
सुंदर सुंदर पंख जसा पिपर का पान
जादू को शाळा मा अाई भलतिच मजा
परी बाई देत नोहति कोनीलाच सजा
वजाबाकी बेरीज दुही उड़त होता छान
सुंदर सुंदर पंख जसा पिपर का पान
गुणाकार भागाकार की भई दुय दूय बात
भागाकरको लगेव मंग मोला भी एक लात
भदकन आपटेव मी डोस्का को भार
सुंदर सुंदर पंख जसा पिपर का पान
उघडेव डोरा त् होतो मी खाटकों खाल्या
अाई मोरी बोंबलत आयी का भयेव रे बाल्या
परी सारखी अाई दिसी जादू ओको काम
सुंदर सुंदर पंख जसा पिपर का पान
सौ छाया सुरेंद्र पारधी
No comments:
Post a Comment