परी रानी
परी राणी परी राणी गोरी गोरी पान
गोल गोल पंख ओका दिससेती छान
एक दिवस परी राणी सपनमा आयी
चल जाबीन फीरनला कसे घाई घाई
सुंदर सलोनो तोला कसे देखावुन रान
गोल गोल पंख ओका दिससेती छान
धरीस मोरो हात ना लेगीस बगीचामा
बहुत सारी परीरानी भयीं वाहा जमा
खेल देखशान परीको हरपगयेव भान
गोल गोल पंख ओका दिससेती छान
लुकाछीपी खेलन बसी सब मोर संग
फुल होता बगीचामा अलग अलग रंग
खेल खेलत होती परी मोरो लगेव ध्यान
गोल गोल पंख ओका दिससेती छान
थक गयी जायशानी झाड् खाल्या बसी
धावत आयी परी राणी कसे काहे रुसी
आकाश मा उळबीन नोकहोऊ परेशान
गोल गोल पंख ओका दिससेती छान
उळान बसी आकाश मा हात मोरो सुटेव
खाल्या पळी जमीन परा सपनच तुटेव
धावत आयी माय, आयेव जानमा जाण
गोल गोल पंख ओका दीससेती छान
डी. पी.राहांगडाले
गोंदिया
28/09/2020
No comments:
Post a Comment